Ideja për krijimin e shtetit bektashi në Tiranë po merr formë, sipas medias franceze “Intelligence Online”, e cila raporton se autoritetet pritet ta zyrtarizojnë në muajt e ardhshëm.

Sipas medias, drejtuesit e Urdhrit Bektashi kanë nisur përgatitjet për funksionimin e shtetit, i cili parashikohet të shtrihet në një territor prej rreth 11 hektarësh dhe është përshkruar si një “Vatikan mysliman”.

Drejtuesit po punojnë për krijimin e një monedhe, të quajtur “Bek”, e cila pritet të indeksohet me çmimin e arit. Gjithashtu, parashikohet lëshimi i pasaportave dhe ngritja e një rrjeti përfaqësuesish jashtë Shqipërisë.

“Intelligence Online ka mësuar se drejtuesit po shqyrtojnë mundësinë e prerjes së monedhave. E njohur si “bek”, monedha ka shumë gjasa të jetë e indeksuar me çmimin e arit. Zyrtarët bektashinj do të lëshojnë gjithashtu pasaporta.“, thuhet në artikull.

Sipas Intelligence Online, përfaqësuesit diplomatikë do të veprojnë nën drejtimin e ambasadorit të përgjithshëm Kreshnik Grezda. Përfaqësuesi për Shtetet e Bashkuara është emëruar Christopher Hyland, ndërsa për Francën dhe Belgjikën është caktuar sipërmarrësi belg me origjinë shqiptare Hazis Vardar.

“Selia Botërore e Bektashinjve, me bazë në Tiranë, po punon gjithashtu në frontin diplomatik. Janë emëruar të dërguar nën drejtimin e ambasadorit të përgjithshëm Kreshnik Grezdës. Përfaqësuesi për SHBA-në, Christopher Hyland, është themeluesi i një kompanie luksoze tekstilesh me bazë në Nju Jork.”, shkruan media.

Sipas medias në fjalë, krijimi i shtetit bektashi u shty për shkak të protestave masive që nisën në fund të majit kundër qeverisë shqiptare.

Artikulli i plotë:

Më pak se dy vjet pasi kryeministri shqiptar njoftoi krijimin e një enklave sovrane bektashiane, drejtuesit e lëvizjes sufi po hedhin themelet për marrjen e statusit zyrtar dhe po emërojnë përfaqësues jashtë vendit.

Krijimi i Shtetit Sovran të Urdhrit Bektashi, i destinuar të jetë shteti më i vogël në botë dhe i përshkruar shpesh si një “Vatikan mysliman”, pritet të zyrtarizohet nga autoritetet shqiptare në muajt e ardhshëm.

I njoftuar nga kryeministri shqiptar Edi Rama në Kombet e Bashkuara në shtator 2024, krijimi i enklavës në Tiranë, e cila me 11 hektarë është vetëm një e katërta e madhësisë së Qytetit të Vatikanit, u vonua për shkak të një lëvizjeje shoqërore që nisi në fund të majit. Protesta masive shpërthyen kundër një kompleksi luksoz hotelesh të planifikuar në ishullin e Sazanit, të lidhur me fondin Affinity Partners të vajzës dhe dhëndrit të presidentit të Shteteve të Bashkuara, Donald Trump, Ivanka Trump dhe Jared Kushner.

Të njohura si “Revolucioni i Flamingove”, për shkak të shpendëve që folezojnë në ishull, protestat morën një karakter politik duke vënë në shënjestër Ramën, i cili ka drejtuar qeverinë për 13 vjet. Rama shpreson që lëvizja të humbasë vrullin, në mënyrë që ai të rifitojë epërsinë. Krijimi i Urdhrit Bektashi, me frymëzim sufi, i cili promovon një Islam të moderuar dhe të hapur ndaj dialogut ndërfetar, është pjesë e kësaj agjende politike.

Monedha dhe pasaporta

Zyrtarët bektashinj dhe udhëheqësi i tyre shpirtëror, Edmond Brahimaj, i njohur më mirë si Baba Mondi dhe i cili ka qenë oficer ushtarak shqiptar deri në rënien e regjimit komunist, po hedhin themelet për shtetin e ardhshëm. Intelligence Online ka mësuar se drejtuesit po shqyrtojnë mundësinë e prerjes së monedhave. E njohur si “bek”, monedha ka shumë gjasa të jetë e indeksuar me çmimin e arit. Zyrtarët bektashinj do të lëshojnë gjithashtu pasaporta. Baba Mondi mirëpret rregullisht delegacione të huaja në selinë e tij në kryeqytetin shqiptar, përfshirë edhe përfaqësues të Ministrisë së Jashtme izraelite në fund të vitit të kaluar.

Selia Botërore e Bektashinjve, me bazë në Tiranë, po punon gjithashtu në frontin diplomatik. Janë emëruar të dërguar nën drejtimin e ambasadorit të përgjithshëm Kreshnik Grezdës. Përfaqësuesi për SHBA-në, Christopher Hyland, është themeluesi i një kompanie luksoze tekstilesh me bazë në Nju Jork. Shumë aktiv në Ballkan, sipërmarrësi ka qenë gjithashtu këshilltar i fushatës gjatë kandidimit të suksesshëm të Bill Clintonit për president në vitin 1992, duke shërbyer si zëvendësdrejtor kombëtar politik për komunitetet etnike. Ambasada amerikane në Tiranë, veçanërisht aktive në çështjet shqiptare (IO, 12/09/25), po e ndjek nga afër krijimin e shtetit bektashi.

Sipërmarrës për Francën dhe Belgjikën

Përfaqësuesi për Francën dhe Belgjikën është Hazis Vardar, një sipërmarrës belg me origjinë shqiptare, i angazhuar në sektorin e kulturës. Vardar është drejtor i disa teatrove dhe muzeve në Evropë, përfshirë edhe në Paris, si dhe në vende të tjera të botës. Në fund të vitit 2024, ai bashkëthemeloi në Shqipëri kompaninë e inteligjencës me burim të hapur (OSINT) DataSentinel Balkans.

Vardar shërben si administrator i kompanisë, ndërsa Julien-Gérard Roche, një biznesmen francez aktiv në Shqipëri që nga vitet 1980 dhe kryetar i Dhomës së Tregtisë dhe Industrisë Francë-Shqipëri, shërben si këshilltar. Në kompani është i përfshirë gjithashtu ish-xhandari Jean-Christophe Cloetens, i cili e njeh mirë Shqipërinë dhe Ballkanin, pasi ka vepruar në rajon gjatë kohës që shërbente në zyrën antiterrorizëm BLAT të xhandarmërisë.

DataSentinel Balkans ka krijuar partneritete me dy kompani franceze për të mbështetur aktivitetin e saj: Cyber ICS, e specializuar në sigurinë kibernetike dhe në “sulmet e pluhurosjes” (dusting attacks), si dhe Terra OSINT, e cila po zhvillon një platformë për analizimin e operacioneve të ndikimit dhe rreziqeve që lidhen me reputacionin.