Lufta mes Shteteve të Bashkuara dhe Iranit mund të zgjasë të paktën edhe gjashtë muaj, ndërsa ekziston rreziku që konflikti të shndërrohet në një “luftë të përjetshme” në Lindjen e Mesme. Paralajmërimi është bërë nga ish-Sekretari amerikan i Mbrojtjes, Leon Panetta, në një intervistë për The Guardian.

Panetta tha se Shtetet e Bashkuara dhe Irani ndodhen në një “ngërç të tmerrshëm” dhe se aktualisht ka pak mundësi për t’i dhënë fund konfliktit.

Sipas tij, lufta mund të zgjasë përtej gjashtë muajve të ardhshëm, duke ngritur shqetësimin se ajo mund të ndjekë të njëjtën rrugë si ndërhyrjet e mëparshme amerikane në Irak dhe Afganistan.

“Lufta në Iran do të vazhdojë për të paktën gjashtë muaj të tjerë”, tha Panetta, duke paralajmëruar se konflikti mund të kthehet në një përplasje afatgjatë pa një zgjidhje të qartë.

Ish-Sekretari i Mbrojtjes kritikoi gjithashtu situatën brenda Pentagonit, duke thënë se forcat amerikane po shkojnë në luftë në një periudhë “turbulence” brenda Departamentit të Mbrojtjes dhe strukturës së komandës.

Sipas Panettas, këto zhvillime mund t’i dërgojnë Iranit dhe kundërshtarëve të tjerë të Shteteve të Bashkuara një mesazh dobësie.

Komentet e tij lidhen me ndryshimet dhe largimet e zyrtarëve të lartë në Pentagon nën drejtimin e Sekretarit të Mbrojtjes Pete Hegseth.

Nga Departamenti i Mbrojtjes kanë kundërshtuar akuzat për kaos brenda institucionit. Zëdhënësi Sean Parnell tha se të pretendosh se Pentagoni është në kaos është një “fyerje për çdo anëtar të ushtrisë”. /Panorama