Presidenti i organizmit më të fuqishëm të futbollit në botë raportohet se po kërkon mbështetje nga administrata amerikane, pasi projekti i tij i diskutueshëm për të shitur një pjesë të të drejtave komerciale të Botërorit u rrëzua përballë rezistencës së fortë.

Sipas një raportimi ekskluziv të New York Post, të cituar edhe nga disa media ndërkombëtare, përfshirë Al Jazeera dhe Goal.com, Infantino është përpjekur të sigurojë mbështetje politike në Uashington pas goditjes së fundit që mori brenda FIFA-s.

Sipas burimeve të cituara nga gazeta amerikane, kreu i FIFA-s ka tentuar disa herë të kontaktojë me telefon presidentin amerikan Donald Trump, por pa marrë përgjigje. Kriza shpërtheu pasi plani për krijimin e një strukture të re investimi, ku një pjesë e të drejtave tregtare të kompeticioneve të FIFA-s do t’u kalonte investitorëve privatë, hasi kundërshtim të fortë. Në mesin e investitorëve të përmendur ishte edhe firma e Joshua Kushner.

Por pas kësaj lëvizjeje, pakënaqësia brenda FIFA-s duket se është rritur. Një nga zyrtarët e brendshëm të organizatës e ka përshkruar përpjekjen për ta rrëzuar Infantinon me termin “Project Kill The Monster”, ndërsa drejtuesi operativ i FIFA-s, Kevin Lamour, ka deklaruar se është ndjerë “i mashtruar” nga zhvillimet.

Goditja më e madhe erdhi nga Evropa. UEFA dhe federatat anëtare raportohet se kanë mbështetur një qëndrim të përbashkët kundër FIFA-s, duke kërcënuar me bojkot të kompeticioneve të ardhshme nëse konfliktet mes dy institucioneve nuk zgjidhen.

Ndërkohë, një pjesë tjetër e raportimit për një takim të planifikuar mes Infantinos dhe Sekretarit amerikan të Shtetit, Marco Rubio, është mohuar nga pala amerikane. Departamenti i Shtetit ka deklaruar se nuk kishte asnjë bisedë të programuar me Infantinon, ndërsa edhe burime pranë FIFA-s e kanë kundërshtuar këtë informacion.

Megjithatë, mesazhi kryesor mbetet i qartë: Infantino ndodhet përballë një prej sfidave më të mëdha që nga marrja e drejtimit të FIFA-s në vitin 2016. Një president që dikur premtoi një FIFA më të hapur dhe më të fortë ekonomikisht, tani po përballet me një front kundërshtar që vjen jo vetëm nga jashtë, por edhe nga brenda organizatës së tij.