Lumir Abdixhiku është rikonfirmuar kryetar i Lidhjes Demokratike të Kosovës, pasi i mbijetoi nismës për shkarkimin e tij në Kuvendin e jashtëzakonshëm të partisë, të mbajtur të enjten në Prishtinë.

Pas një dite të mbushur me tensione dhe debat të ashpër brenda partisë, delegatët votuan për fatin e Abdixhikut. Në votimin final, 170 delegatë u shprehën kundër shkarkimit të tij, ndërsa 152 votuan pro largimit nga posti i kryetarit, duke i dhënë kështu besimin për të vazhduar drejtimin e LDK-së.

Kuvendi ishte thirrur pas zgjedhjeve parlamentare të 7 qershorit, në të cilat LDK-ja u rendit sërish e treta me 16.7 për qind të votave. Rezultati kishte nxitur një grup zyrtarësh dhe delegatësh të kërkonin përgjegjësi politike dhe ndryshim në udhëheqje, duke iniciuar mbledhjen e nënshkrimeve për shkarkimin e Abdixhikut.

Para votimit, Abdixhiku e cilësoi Kuvendin si të panevojshëm dhe në kohë të gabuar, duke akuzuar disa figura të partisë për sabotim dhe përpjekje për ta futur LDK-në në krizë. Ai tha se nuk e shihte këtë Kuvend si festë të demokracisë së brendshme, por si një përpjekje për rrëzim.

Pas shpalljes së rezultatit, Abdixhiku u zotua se do të punojë për bashkimin e partisë, duke theksuar se nuk do të bëjë kompromise me vlerat e LDK-së dhe se do të shmangë përçarjet e brendshme. Ai e quajti procesin e shkarkimit një nga momentet më pak krenare në historinë 37-vjeçare të LDK-së, por tha se vota e delegatëve i dha legjitimitetin për të vazhduar punën.

Menjëherë pas rikonfirmimit, Abdixhiku njoftoi se LDK-ja do t’i rikthehet negociatave me Vetëvendosjen për formimin e institucioneve të reja. Ai bëri të ditur se pezullimi i bisedimeve, i vendosur për shkak të procesit të brendshëm në parti, tashmë është hequr dhe se LDK-ja është e gatshme të vazhdojë diskutimet për krijimin e institucioneve.

Rezultati u përshëndet nga mbështetësit e Abdixhikut. Vjosa Osmani reagoi duke shkruar se “jo çdo fitore është e zakonshme, disa bëhen frymëzim”, ndërsa delegatë si Berat Rukiqi vlerësuan se Kuvendi nuk kishte qenë i nevojshëm dhe se vota e delegatëve i dha qartësi të ardhmes së partisë.

Nga ana tjetër, përkrahësit e ndryshimit pranuan verdiktin e shumicës. Deputeti Armend Zemaj tha se ai dhe 151 delegatë kishin besuar se ndryshimi do t’i sillte sukses LDK-së, por se shumica kishte vendosur ndryshe dhe se ky ishte tashmë realiteti politik i partisë. /Express